Siulequt

Kalaallit Nunaanni Naatsorsueqqissaartarfiup 2017-imut ukiumoortumik nalunaarusiaa saqqummiunneqarpoq. Naatsorsueqqissaartarfiup suliassai, tassunga ilanngullugit suliffeqarfiup inatsisitigut tunngavigisai aqutsinermilu pissutsit nalunaarusiami allaaserineqarput. Tamatuma saniatigut Naatsorsueqqissaartarfimmi 2017-imi kisitsisitigut paasissutissat suliarineqartut kiisalu suliffeqarfiup aningaasaqarnerat, sulisullu pillugit takussutissat nalunaarusiap imarai. 2016-imi pisut assigalugit Naatsorsueqqissaartarfiup nittartagaa 2017-imut ukiumoortumik nalunaarusiami immikkut sammineqarpoq.

 

Ukiumoortumik nalunaarusiamut atatillugu ingerlatsinermi pilersaarut siulersuisut akuerisimasaat ukiumut ataasiarluni nutarterlugu saqqummersinneqassaaq.

 

2017-imi Naatsorsueqqissaartarfimmi sulisut ukiunut siullernut naleqqiullugit nikerarnerupput. Taamaattumik kisitsisitigut paasissutissat annertusinagit aamma amerlinagit ukiut siuliini saqqummersitat amerlisimaneri 2017-imi nikisinnaveersaarneqarput. 

 

Ineriartornerup ilorraap tungaanut ingerlatiinnarnissaanut massakkut sulisut suliinnarsinnaanissaat suliffimmullu piukkunnartunik sulisunik pissarsiornissap ajornannginnerusumik pisinnaanissaq apeqqutaalluinnarput. Naatsorsueqqissaartarfimmit pisortaqarfinni allaffissornikkut nalunaarsuiffiit najoqqutatut atorneqarluartarmata, sulinermut aamma iluaqutaalluarpoq allaffissornikkut IT atorlugu nalunaarsuiffiit pitsanngungaatsiarsimaneri.

 

 

 

Vøgg Løwe Nielsen

Siulersuisunut siulittaasoq